യുകെയില്‍ ഇലക്ട്രിക് വാഹനങ്ങളിലേക്കുള്ള മാറ്റം പ്രതീക്ഷിച്ചതിനെക്കാള്‍ വേഗം കുറയും. രാജ്യത്തു ഇലക്ട്രിക് കാര്‍ ചാര്‍ജര്‍ സ്ഥാപിക്കല്‍ മന്ദഗതിയില്‍ ആയതാണ് കാരണം. കാര്‍ ചാര്‍ജര്‍ സ്ഥാപിക്കല്‍ 2025ല്‍ ഗണ്യമായി മന്ദഗതിയിലായതായി റിപ്പോര്‍ട്ടുകള്‍ പുറത്തു വന്നു. ഇലക്ട്രിക് വാഹനങ്ങളിലേക്കു ആളുകളുടെ താല്പര്യം കൂടാത്തതും നിക്ഷേപകരിലെ ആശങ്കകളും ചാര്‍ജര്‍ സ്ഥാപിക്കല്ലിന്റെ വേഗം കുറയാന്‍ കാരണമായതായാണ് പുറത്തു വരുന്ന റിപ്പോര്‍ട്ടുകള്‍ സൂചിപ്പിക്കുന്നത്.

സാപ്മാപ്പ് പുറത്തുവിട്ട കണക്കുകള്‍ പ്രകാരം, നവംബര്‍ അവസാനം യുകെയില്‍ മൊത്തം 87,200 ചാര്‍ജിങ് പോയിന്റുകളാണുള്ളത്. 2024 അവസാനം അപേക്ഷിച്ച് 13,500 പുതിയ ചാര്‍ജറുകള്‍ മാത്രമാണ് കൂട്ടിച്ചേര്‍ത്തത് ‘ ഇത് 2022ന് ശേഷം ഏറ്റവും കുറഞ്ഞ വര്‍ധനവായാണ് വിലയിരുത്തപ്പെടുന്നത്.

ഇത് ചാര്‍ജര്‍ ഇന്‍സ്റ്റലേഷനിലെ വാര്‍ഷിക വളര്‍ച്ച 20 ശതമാനത്തില്‍ താഴെയാക്കുമെന്നും, കഴിഞ്ഞ വര്‍ഷത്തെ 37 ശതമാന വളര്‍ച്ചയുമായി താരതമ്യപ്പെടുത്തുമ്പോള്‍ വന്‍ ഇടിവാണിതെന്നും റിപ്പോര്‍ട്ട് ചൂണ്ടിക്കാട്ടുന്നു. അതേസമയം, ഇലക്ട്രിക് കാറുകളുടെ വില്‍പന വളര്‍ച്ച തുടരുകയാണ്. 2025ലെ ആദ്യ 11 മാസങ്ങളില്‍ ബ്രിട്ടനിലെ കാര്‍ വില്‍പനയുടെ 23 ശതമാനവും ഇലക്ട്രിക് വാഹനങ്ങളാണ്. കഴിഞ്ഞ വര്‍ഷത്തെ 19 ശതമാനത്തില്‍ നിന്ന് ഇത് വളരെ കൂടുതലാണ് . എന്നാല്‍ ചില വാഹന നിര്‍മാതാക്കള്‍ പെട്രോളില്‍നിന്ന് ഇലക്ട്രിക്കിലേക്കുള്ള മാറ്റം മന്ദഗതിയിലാക്കിയതും സര്‍ക്കാര്‍ ഇ.വി. വില്‍പന ലക്ഷ്യങ്ങള്‍ ദുര്‍ബലപ്പെടുത്തിയതും ഈ രംഗത്തെ വളര്‍ച്ചയെ ബാധിച്ചതായി വിദഗ്ധര്‍ വിലയിരുത്തുന്നു.

സര്‍ക്കാരിന്റെ ചില നയങ്ങള്‍ ചാര്‍ജര്‍ ഇന്‍സ്റ്റലേഷനിലെ ഇടിവിന് കാരണമായെന്ന് എനര്‍ജി ആന്‍ഡ് ക്ലൈമറ്റ് ഇന്റലിജന്‍സ് യൂണിറ്റ് വ്യക്തമാക്കി. 2028 മുതല്‍ ഇലക്ട്രിക് വാഹനങ്ങള്‍ക്ക് മൈലിന് 3 പെന്‍സ് നികുതി ഏര്‍പ്പെടുത്തുമെന്ന പ്രഖ്യാപനവും ഉപഭോക്തൃ വിശ്വാസത്തെ ബാധിക്കുമെന്നാണ് വിലയിരുത്തല്‍. ചാര്‍ജിങ് മേഖലയിലെ ചെലവ് വര്‍ധനയും ഗ്രിഡ് കണക്ഷനിലെ വൈകിപ്പും ഇന്‍സ്റ്റലേഷന്‍ മന്ദഗതിയിലാക്കിയതായി ചാര്‍ജ് യുകെ വ്യക്തമാക്കി.

അതേസമയം, മോട്ടോര്‍വേകളിലെ അള്‍ട്രാ-റാപിഡ് ചാര്‍ജറുകളുടെ എണ്ണം 39 ശതമാനം ഉയര്‍ന്നതായും, ലണ്ടന്‍ ഉള്‍പ്പെടെയുള്ള മേഖലകളുമായി താരതമ്യപ്പെടുത്തുമ്പോള്‍ നോര്‍ത്ത് അയര്‍ലന്‍ഡ് പോലുള്ള പ്രദേശങ്ങള്‍ ഇപ്പോഴും പിന്നിലാണെന്നും റിപ്പോര്‍ട്ട് ചൂണ്ടിക്കാട്ടുന്നു.

ഇന്ത്യയില്‍ വിതരണം ചെയ്യപ്പെടുന്ന പേവിഷബാധ (Rabies) വാക്സിനുകളില്‍ വ്യാജ പതിപ്പുകള്‍ കലർന്നിട്ടുണ്ടാകാമെന്ന ആശങ്കയുമായി ഓസ്‌ട്രേലിയൻ ആരോഗ്യ അധികൃതർ.

ഇന്ത്യ സന്ദർശിക്കവേ അവിടെനിന്ന് വാക്സിൻ സ്വീകരിച്ച യാത്രക്കാരെ ഇത് ബാധിച്ചേക്കാമെന്നാണ് മുന്നറിയിപ്പ്. ‘അഭയറാബ്’ (Abhayrab) എന്ന പേവിഷബാധ വാക്സിന്റെ വ്യാജ പതിപ്പുകള്‍ 2023 നവംബർ 1 മുതല്‍ വിതരണത്തിലുണ്ടെന്ന് ഓസ്‌ട്രേലിയൻ ടെക്നിക്കല്‍ അഡ്വൈസറി ഗ്രൂപ്പ് ഓണ്‍ ഇമ്യൂണൈസേഷൻ (ATAGI) അറിയിച്ചു.

അഭയറാബ് ഓസ്‌ട്രേലിയയില്‍ അംഗീകരിക്കപ്പെട്ടതോ വിതരണം ചെയ്യുന്നതോ ആയ വാക്സിൻ അല്ല. എങ്കിലും, ഇന്ത്യ സന്ദർശിച്ച വേളയില്‍ ഈ വാക്സിൻ സ്വീകരിച്ചവർക്ക് പേവിഷബാധയ്ക്കെതിരെ മതിയായ പ്രതിരോധം ലഭിക്കാനിടയില്ലെന്നും, അവർക്ക് ഓസ്‌ട്രേലിയയില്‍ മടങ്ങിയെത്തിയ ശേഷം തുടർചികിത്സ ആവശ്യമായി വന്നേക്കാമെന്നും അധികൃതർ ചൂണ്ടിക്കാട്ടുന്നു.

എന്തുകൊണ്ടാണ് ഈ മുന്നറിയിപ്പ് പ്രസക്തമാകുന്നത്?

പേവിഷബാധ നാഡീവ്യവസ്ഥയെ ബാധിക്കുന്ന ഒരു വൈറസ് രോഗമാണ്. രോഗലക്ഷണങ്ങള്‍ കണ്ടുതുടങ്ങിയാല്‍ ഇത് മിക്കവാറും മരണകാരണമാകും. ഓസ്‌ട്രേലിയ പേവിഷബാധയില്ലാത്ത രാജ്യമാണെങ്കിലും ഇന്ത്യയുള്‍പ്പെടെയുള്ള പല രാജ്യങ്ങളിലും ഈ രോഗം സ്ഥിരമായി കാണപ്പെടുന്നു. സാധാരണയായി നായ പോലുള്ള രോഗബാധിതരായ മൃഗങ്ങളുടെ കടിയേറ്റോ മാന്തലേറ്റോ അവയുടെ ഉമിനീർ വഴിയോ ആണ് ഈ രോഗം പകരുന്നത്.

വ്യാജ വാക്സിനുകളില്‍ കൃത്യമായ ചേരുവകള്‍ ഇല്ലാത്തതോ അല്ലെങ്കില്‍ അവ തെറ്റായ രീതിയില്‍ നിർമ്മിക്കപ്പെട്ടതോ ആയതിനാല്‍, കടിയേറ്റതിന് ശേഷമുള്ള ചികിത്സ പരാജയപ്പെടാൻ സാധ്യതയുണ്ടെന്ന് ആരോഗ്യ വിദഗ്ധർ മുന്നറിയിപ്പ് നല്‍കുന്നു.

ആരെയൊക്കെ ഇത് ബാധിക്കാം?

2023 നവംബർ 1-നോ അതിന് ശേഷമോ ഇന്ത്യയില്‍ നിന്ന് പേവിഷബാധ വാക്സിൻ സ്വീകരിച്ചവർ.

ഇന്ത്യയില്‍ വെച്ച്‌ ‘അഭയറാബ്’ വാക്സിൻ സ്വീകരിച്ചവർ അല്ലെങ്കില്‍ ഏത് ബ്രാൻഡ് വാക്സിൻ ആണ് സ്വീകരിച്ചതെന്ന് ഉറപ്പില്ലാത്തവർ.

ഓസ്‌ട്രേലിയയിലോ മറ്റ് രാജ്യങ്ങളിലോ വെച്ച്‌ പൂർണ്ണമായും വാക്സിനേഷൻ എടുത്തവർക്കും, അംഗീകൃതമായ മറ്റ് വാക്സിനുകളാണ് സ്വീകരിച്ചതെന്ന് വ്യക്തമായ രേഖകളുള്ളവർക്കും ആശങ്കപ്പെടേണ്ട സാഹചര്യമില്ല.

ബാധിക്കപ്പെട്ടവർക്കായി ATAGI നല്‍കുന്ന നിർദ്ദേശങ്ങള്‍

വ്യാജ വാക്സിൻ സ്വീകരിച്ചിട്ടുണ്ടാകാമെന്ന് സംശയമുള്ളവർ എത്രയും വേഗം ഒരു ജനറല്‍ പ്രാക്ടീഷണറെയോ (GP) ട്രാവല്‍ ഹെല്‍ത്ത് സ്പെഷ്യലിസ്റ്റിനെയോ കണ്ട് ഉപദേശം തേടണം. പൂർണ്ണമായ പ്രതിരോധം ഉറപ്പാക്കുന്നതിനായി ഓസ്‌ട്രേലിയയില്‍ അംഗീകരിച്ച വാക്സിൻ ഉപയോഗിച്ച്‌ വീണ്ടും വാക്സിനേഷൻ എടുക്കാൻ ഡോക്ടർമാർ നിർദ്ദേശിച്ചേക്കാം. പേവിഷബാധ തടയുന്നതില്‍ എത്രയും വേഗത്തിലുള്ള ചികിത്സ നിർണ്ണായകമാണ്.

യാത്രക്കാർക്കുള്ള പ്രധാന നിർദ്ദേശങ്ങള്‍

പേവിഷബാധയുള്ള രാജ്യങ്ങളിലേക്ക് യാത്ര ചെയ്യുന്നവർ താഴെ പറയുന്ന മുൻകരുതലുകള്‍ എടുക്കണം:

യാത്രയ്ക്ക് മുൻപ് ആവശ്യമായ വാക്സിനുകളെക്കുറിച്ച്‌ ആരോഗ്യ വിദഗ്ധരുമായി സംസാരിക്കുക.

വന്യമൃഗങ്ങള്‍, തെരുവ് നായ്ക്കള്‍, പൂച്ചകള്‍, കുരങ്ങുകള്‍ എന്നിവയുമായുള്ള സമ്ബർക്കം ഒഴിവാക്കുക.

മൃഗങ്ങളുടെ കടിയോ മാന്തലോ ഏറ്റാല്‍ ഉടൻ തന്നെ മുറിവ് നന്നായി കഴുകുകയും അടിയന്തര ചികിത്സ തേടുകയും ചെയ്യുക.

വിദേശത്ത് നിന്ന് സ്വീകരിക്കുന്ന വാക്സിനുകളുടെ പേര്, തീയതി, ബാച്ച്‌ നമ്ബർ എന്നിവയുടെ വിവരങ്ങള്‍ സൂക്ഷിക്കുക.

സാധ്യമാകുന്ന സാഹചര്യങ്ങളില്‍ വാക്സിൻ പാക്കറ്റിന്റെയോ ലേബലിന്റെയോ ചിത്രം പകർത്തി സൂക്ഷിക്കുക.

യൂറോപ്യന്‍ രാജ്യങ്ങള്‍ അനിയന്ത്രിത കുടിയേറ്റം നേരിടുന്ന സാഹചര്യത്തില്‍ മനുഷ്യാവകാശ ചട്ടങ്ങള്‍ പുതുക്കാന്‍ യുകെ ഉള്‍പ്പെടയുള്ള യൂറോപ്യന്‍ രാജ്യങ്ങള്‍. യൂറോപ്യന്‍ മനുഷ്യാവകാശ കോടതിയായ ഇ സി എച്ച് ആറിന്റെ കുടിയേറ്റ കേസുകള്‍ കൈകാര്യം ചെയ്യുന്ന രീതിയില്‍ വലിയ മാറ്റങ്ങള്‍ക്ക് തുടക്കമിടുന്ന അന്തര്‍ദേശീയ ചര്‍ച്ചകള്‍ സ്‌ട്രാസ്ബര്‍ഗില്‍ നടന്നുവരുകയാണ്. അനധികൃത കുടിയേറ്റം തടയാനും അതിര്‍ത്തി നിയന്ത്രണം ശക്തമാക്കാനും നിയമങ്ങള്‍ പുതുക്കാനുള്ള ആവശ്യം ഉയര്‍ന്ന സാഹചര്യത്തിലാണ് യുകെ, ഡെന്‍മാര്‍ക്ക് തുടങ്ങിയ രാജ്യങ്ങള്‍ ആശയ വിനിമയത്തിന് നേതൃത്വം നല്‍കുന്നത്. ഈ ചര്‍ച്ചകള്‍ വിജയിച്ചാല്‍ മനുഷ്യാവകാശ കരാറിന്റെ 75 വര്‍ഷത്തെ ചരിത്രത്തില്‍ ഏറ്റവും വലിയ മാറ്റമാവുമെന്നാണ് വിലയിരുത്തല്‍.

യുകെയുടെ ഡെപ്യൂട്ടി പ്രധാനമന്ത്രി ഡേവിഡ് ലാമി നേതൃത്വം നല്‍കുന്ന സംഘം ഇ സി എച്ച് ആറില്‍ തുടരുമെന്ന ഉറപ്പ് നല്‍കിക്കൊണ്ടാണ് മാറ്റങ്ങള്‍ ആവശ്യപ്പെട്ടിരിക്കുന്നത്. നിലവിലെ നിയമങ്ങള്‍ കാരണം ചില അനധികൃത കുടിയേറ്റക്കാരെ തിരികെ അയയ്ക്കുന്നതില്‍ തടസമുണ്ടാകുന്നു എന്നതാണ് യുകെ ഉയര്‍ത്തുന്ന മുഖ്യ വാദം. യൂറോപ്പിന് പുറത്തുള്ള സുരക്ഷിത രാജ്യങ്ങളില്‍ ‘റിട്ടേണ്‍സ് ഹബ്ബുകള്‍’ തുറന്ന് അവകാശമില്ലാത്തവരെ താമസിപ്പിക്കാനുള്ള നിര്‍ദേശവും ചര്‍ച്ചയില്‍ ഉണ്ട്.

ഡെന്‍മാര്‍ക്കും ഇറ്റലിക്കുമൊപ്പം ഒന്‍പത് രാജ്യങ്ങള്‍ ഇതിനകം തന്നെ മനുഷ്യാവകാശ ചട്ടങ്ങള്‍ പുതുക്കണമെന്ന ആവശ്യം മുന്നോട്ടുവച്ചിട്ടുണ്ട്. ആര്‍ട്ടിക്കിള്‍ 3, ആര്‍ട്ടിക്കിള്‍ 8 എന്നീ വ്യവസ്ഥകള്‍ കുടിയേറ്റ കേസുകളില്‍ എങ്ങനെ പ്രയോഗിക്കണം എന്നതാണ് പ്രധാന പരിഗണന. വരാനിരിക്കുന്ന മേയ് മാസത്തോടെ അംഗരാജ്യങ്ങള്‍ ചേര്‍ന്ന് ഒരു പൊതു രാഷ്ട്രീയ പ്രസ്താവന തയ്യാറാക്കുക എന്നതാണ് ചര്‍ച്ചകളുടെ ലക്ഷ്യം.